Friday, April 30, 2010

Apo Kono Eh Jang....



Batu Kikir Jambatan Bosi
Gulai Udang Sebelango
Cubo omak fikir dalam hati
Ayo ni bujang sudah lamo aih…..

Apo kono eh jang kau monung ajo

Orang ke bulan ekau di mano
……….



Hahaha sojak malam khamis aritu lagu ni la yang berlegar-legar dalam palo otak den ni ha. Sesapo yo orang-orang nogori sombilan kalo tak tau lagu ni, tak tau la den nak koba macam mano doh. Tak ngaku sedaro.


Haa dek sobab lagu ni la, malam tu mengangkang kiap den balik kojo semato-mato nak poie ke Istano Budaya. Den nak nengok teater Teratak Minang The Muzikal. Den takdo la plan nak nengok cito ni memandangkan den bukan jiwo2 teater ni. Tapi dek penangan Eby Yus, mengelintin la den nk poie. Laie pun dapek tiket free kan. Sapo taknak. Credit kek Mr Curly ateh tiket free tu yo. (Bapak Mr. Curly ni ado belakon sekali dlm teato ni. Tu yang dapek tiket tu).



Ops lupo lak. Show yang kitorang poie nengok tu sobonar eh bukan show yg boto2 eh doh. Tu cumo rehearsal memandangkan tiket-tiket show boto eh dah abih diborong dek Mak Nani ngan VIP Indon yang ado kek Malaysia ni.

Torus torang agak gayat gak la nak poie IB tu memandangkan den tak ponah poie tompek2 orang soni ni. Leko dek bergambar kek sanun. Paling terujo bilo dapeke bergambo camo Eby Yus! Sayang kat dalam panngung tu tak buleh pulak nak ambik gambar. Den nengok takdo orang pun yang sibuk-sibuk nk amik gambar. Sogan la pulak kalo den sorang yo yang bergambar. Kang dikoba pulak den ni minah jakun!


Hebat!!!


Itu yo yang den buleh cakap pasal teato tu. Tapi leko boto orang-orang Indon tu menyanyi. Den rase sopanjang lobih kurang 2 jam setongah tu, lobih dari 20 lagu la orang tu nyanyi. Ala dah namo pon muzikal kan. Paling den goma time lagu Apo Kono Eh Jang,Ayam Den Lapeh, Anak Bocek ngan Dinding Barinding. Kalau la situ bukan IB dah lamo dah den mengelonjet time nyanyi lagu-lagu tu!


Selain lagu, naik berpinar gak mato den nengok penari-penari yang manjang menari yo sepanjang teato tu. Dari tarian piring, tarian payung, tarian ending(tarian maso lagu Dinding Barinding) dan tarian randai(tarian yang mewajibkan penari2 memukul kain dengan kuek) sumo eh buek den teruja. Siap ado scene pijak-pijak kaco laie tu. Hebat gabungan penari-penari Malaysia dan penari-penari dari Padang tu.


Walaupun ado ado dialog-dialog yang den tak paham terutamo eh dialog dalam bahasa Minang tu, tapi teato ni tetap best. Nak-nak lagi ado lawak-lawak dari Eby Yus. Tahniah untuk semua pelakon, penari, crew dan pemuzik. Pak Ngah punyo muzik memang TERBAIK!!!!

p/s:
Teater ni sebenarnya didedikasikan kepada mangsa-mangsa gempa bumi di Padang, Indonesia awal tahun dulu. Ia juga bertujuan mengutip derma bagi membantu meringankan beban mangsa-mangsa gemba bumi tersebut. Syabas Den Wahab!


2 comments

May 3, 2010 at 10:41 AM

napo tak ajak atok poie?

May 4, 2010 at 10:31 AM

ala tok, last minit dapek tiket..len kali kito poie sesamo yo tok..

Post a Comment
Twitter Bird Gadget